Andramo anie hoe zaza tsy tia sosety no omena ity laoka manaraka ity fa ho hitanao fa tonga izy dia mahalany betsaka avy hatrany: saosety sy totokena.
Saosety sy totokena
Isan’ny olona: 4
Fotoana hikarakarana azy: 5 mn
Fotoana hiketrehana azy : 30 mn
Akora ilaina
- Saosety maromaro,
- Totokena,
- Voatabia, Tongolo, Rano,
- Sira, poivre,
- Tamotamo (na colombo)
Saosety sy totokena
Fikarakarana saosety sy totokena
- Zaraina roa amin’ny halavany ny saosety, lomana rano 5mn vao voasana hialan’ny ditiny ary tetehina « en dés » vaventy.
- Endakendasina ny totokena, arotsaka ny tongolo sy voatabia, avela ho ritra tsara.
- Arotsaka ny sosety sy sira sy poivre ary rano mahamasaka azy dia avela hiketrika.
- Rehefa ketsaketsa dia asiana Colombo (épices hita eny amin’ny grandes surfaces) fa azo soloina tamotamo koa. Avela hiketrika 3 mn dia vita.
Fanamarihana
Hoan’ireo tsy mihinana hena dia afaka manao sosety sy Totom-boanjo na koa saosety sy atody.
Saosety sy totom-boanjo
Na dia voky mofo makasaoka sy mofo baolina aza dia tena mbola nazoto homany ihany satria saosety sy Totom-boanjo ny laoka. Ela tsy nihinana mantsy. Mety ho an’ny vehivavy mampinono ihany koa ity laoka ity fa maha-be ronono ho an’ny zazakely.
Isan’ny olona: 4
Fotoana hikarakarana azy: 10 mn
Fotoana hiketrehana azy : 30 mn
Akora ilaina
- Saosety,
- tongolo, voatabia, rano,
- Sira, poivre,
- tongolo lay
- voanjo
Fikarakarana Saosety sy Totom-boanjo
- Zaraina roa amin’ny halavany ny saosety dia lomana rano 5 mn vao voasana hialan’ny ditiny. Avy eo tetehina « en dés ».
- Manao saosy tongolo sy voatabia. Eto dia tsy asiana menaka fa ny ranom-boatabia no nanamasahana ny saosy ary ny voanjo efa mahasolo menaka.
- Arotsaka ny sosety sy rano mahamasaka azy sy sira ary poivre.
- Rehefa masamasaka dia arotsaka ny totom-boanjo sy tongolo lay kely. Mety daholo na voanjo manta na masaka.
- Avela hiketrika 5mn, tsy avela hiraikitra fa atao ketsaketsa.
Saosety farcie façon gratin
Fikarakarana saosety farcie façon gratin amin’ny fomba nahandro malagasy.
Isan’ny olona: 4
Fotoana hikarakarana azy: 10 mn
Fotoana hiketrehana azy : 30 mn
Akora ilaina
- Saosety 4,
- chair à saucisse,
- 1 tongolo lay,
- 1 tongolo,
- thym,
- poivre, sira
- farce (omby, kisoa na akoho),
- fromage
- vary na mofo
Fikarakarana saosety farcie façon gratin
- Rehefa voavaofy ny saosety dia zaraina 2 amin’ny halavany, esorina amin’ny sotrokely ny nofony.
- Tetehina madinika ny nofon’ny sosety, afangaro chair a saucisse sy tongolo lay sy tongolo sy thym sy poivre sy sira.
- Osorana sira ny atin’ny saosety vao asiana farce (somary matsatso mantsy ny sosety).
- Afanaina ny menaka, alahatra ny saosety (ny ahy teto nisy ambiny ny farce ka natao lafika). Asiana rano dia avela hiketrika. Tsy avela halemy be ny sosety.
- Rehefa ritra sy antonony ny halemin’ny saosety, rarahana fromage râpé dia saromana hitsonika tsara.
- Tsara aroso avy hatrany, azo hinanana vary na mofo.
Tilapia sy saosety
Avy nandeha nanjono androany dia nahazo tilapia maromaro ka tonga dia natao laoka avy hatrany nampiarahina amin’ny sosety. Ka indro ary ny tilapia sy saosety .
Isan’ny olona: 4
Fotoana hiketrehana azy : 15 mn
Fotoana hikarakarana azy : 10 mn
Akora Ilaina
- trondro tilapia,
- tongolo sy voatabia;
- saosety maromaro
- tongolo lay, sira, poivre;
- rano.
Fomba fikarakarana tilapia sy saosety
Manao saosy tongolo sy voatabia.
Arotsaka ny sosety, rarahana lay sy sira ary poivre kely.
Apetraka ambony saosety ny trondro, rarahana sira sy poivre kely indray.
Asiana rano roa vera dia saromana ary avela hiketrika.
Fanamarihana
- Tsy aroina mihitsy fa ny vilany no ahetsiketsika matetika mba tsy hiraikitra.
- Tsy ataoko ritra be fa avela hisy sauce.
- Ny tongolo lay eto dia azo potserina na tetehina fotsiny.